BBMA POLICE E:NEWS// పదవీ విరమణ అనంతరం కుటుంబంతో సంతోషంగా గడపండి: అదనపు డీసీపీ రవి సూచన

వరంగల్ పోలీస్ కమిషనరేట్‌లో సుదీర్ఘకాలం సేవలందించి పదవీ విరమణ పొందిన పోలీస్ అధికారులను ఘనంగా సత్కరించారు. మంగళవారం నిర్వహించిన కార్యక్రమంలో అదనపు డీసీపీ రవి జ్ఞాపికలు అందజేసి అభినందనలు తెలిపారు.

ఈ సందర్భంగా ఆయన మాట్లాడుతూ, పదవీవిరమణ పొందిన అధికారులు తమ సేవల ద్వారా నేటి తరం పోలీసులకు ఆదర్శంగా నిలిచారని పేర్కొన్నారు. ఇకపై కుటుంబ సభ్యులతో సమయం గడుపుతూ ఆరోగ్యం పట్ల ప్రత్యేక శ్రద్ధ చూపాలని సూచించారు. అలాగే ప్రభుత్వంనుంచి అందే పదవీ విరమణ ప్రయోజనాలను భవిష్యత్ అవసరాల కోసం సమర్థంగా వినియోగించుకోవాలని తెలిపారు.

పదవీ విరమణ పొందిన వారిలో సబ్ ఇన్‌స్పెక్టర్లు కె. సుధాకర్, ఎం.డి. యాకుబ్ అలీ, ఏఆర్‌ఎస్ఐలు సయ్యద్ సాధత్ అలీ, ఎస్. ఉపేంద్రం, హెడ్ కానిస్టేబుళ్లు డి. గత్తయ్య, కె. సోమనారాయణ, జి. ప్రేమ్ సుందర్, ఆర్. సమ్మయ్య ఉన్నారు.

ఈ కార్యక్రమంలో అదనపు డీసీపీలు సురేష్ కుమార్, శ్రీనివాస్, ఇతర అధికారులు, సిబ్బంది, కుటుంబ సభ్యులు పాల్గొన్నారు.

BBMA POLICE E:NEWS// Arrive Alive కార్యక్రమంతో డ్రైవర్లకు ఆరోగ్య–రోడ్డు భద్రత అవగాహన

ఆదిలాబాద్ జిల్లా ఉట్నూర్‌లో “Arrive Alive” కార్యక్రమం భాగంగా పోలీస్ శాఖ డ్రైవర్ల కోసం ప్రత్యేకంగా ఉచిత కంటి పరీక్ష శిబిరాన్ని నిర్వహించింది. ఈ శిబిరంలో మొత్తం 230 మంది డ్రైవర్లు పాల్గొని తమ కంటి ఆరోగ్యాన్ని పరీక్షించుకున్నారు.

జిల్లా ఎస్పీ అఖిల్ మహాజన్ మాట్లాడుతూ రోడ్డు ప్రమాదాలను నివారించడంలో డ్రైవర్ల పాత్ర కీలకమని, ప్రతి ఒక్కరూ రక్షణాత్మక డ్రైవింగ్ పాటించాలని సూచించారు. మద్యం సేవించి వాహనం నడపడం, అక్రమ రవాణా వంటి చర్యలను పూర్తిగా నివారించాలని హెచ్చరించారు.

ఈ శిబిరంలో 30 మంది డ్రైవర్లకు ఉచిత కళ్లద్దాలు పంపిణీ చేయగా, మరింత వైద్యం అవసరమైన వారికి చికిత్స అందించేందుకు చర్యలు చేపట్టారు. డ్రైవర్ల ఆరోగ్యం మెరుగుపడితేనే రోడ్డు భద్రత సాధ్యమని అధికారులు పేర్కొన్నారు. కార్యక్రమం ద్వారా అవగాహన పెంచడమే లక్ష్యమని తెలిపారు.

BBMA POLICE E:NEWS// బాలల భద్రతపై అవగాహన సదస్సులు – కలెక్టర్ పిలుపు

జిల్లా కలెక్టర్ డా. ఎన్. ప్రభాకర రెడ్డి గారి ఆదేశాల మేరకు రామకృష్ణ డిగ్రీ కళాశాలలో మహిళా శిశు సంక్షేమ శాఖ ఆధ్వర్యంలో పోక్సో చట్టం (2012) మరియు బాలల హక్కులపై అవగాహన కార్యక్రమం నిర్వహించారు. జిల్లా బాలల సంరక్షణ విభాగం ఆధ్వర్యంలో విద్యార్థులకు చట్టపరమైన అంశాలపై సమగ్ర వివరణ ఇచ్చారు.

పోక్సో చట్టం కింద బాలలపై లైంగిక వేధింపులకు కఠిన శిక్షలు ఉంటాయని, సెక్షన్ 3, 4 కింద కనీసం 10 ఏళ్ల జైలు శిక్ష, సెక్షన్ 5, 6 కింద జీవిత ఖైదు వరకు శిక్షలు విధించబడతాయని వివరించారు. బాల్య వివాహాల నిరోధం, మానసిక వేధింపులపై చట్టపరమైన చర్యలపై కూడా చర్చించారు.

విద్యార్థులు ఎలాంటి వేధింపులు ఎదురైనా భయపడకుండా వెంటనే 1098 లేదా 181 హెల్ప్‌లైన్‌ను సంప్రదించాలని సూచించారు. “డ్రగ్స్ వద్దు – జీవితమే ముద్దు” అనే సందేశంతో బాధ్యతాయుత జీవనం గడపాలని అధికారులు పిలుపునిచ్చారు.