బిబిఎంఏ న్యూస్ /

భూపాలపల్లి జిల్లా, ఏప్రిల్ 20: రేవంత్ రెడ్డి సోమవారం జయశంకర్ భూపాలపల్లి జిల్లా పర్యటనలో భాగంగా కాళేశ్వరం చేరుకున్నారు. ముందుగా శ్రీ కాళేశ్వర ముక్తేశ్వర స్వామి దేవస్థానంలో ప్రత్యేక పూజలు నిర్వహించి స్వామివారిని దర్శించుకున్నారు. ఆలయ అధికారులు, అర్చకులు పూర్ణకుంభంతో సీఎంకు స్వాగతం పలికారు. అనంతరం శ్రీ శుభానంద (పార్వతి) అమ్మవారి ఆలయంలో కూడా ప్రత్యేక పూజల్లో పాల్గొన్నారు.

ఈ సందర్భంగా రూ.198 కోట్ల వ్యయంతో చేపట్టనున్న కాళేశ్వరం ఆలయ అభివృద్ధి పనులకు సీఎం భూమిపూజ నిర్వహించారు. ఆలయ అధికారులు స్వామివారి శేషవస్త్రాలతో సీఎంను సన్మానించి, చిత్రపటాన్ని అందజేశారు. అర్చకులు తీర్థప్రసాదం అందించి ఆశీర్వచనం చేశారు. సీఎం రాకతో ఆలయ పరిసరాలు సందడిగా మారాయి.

తరువాత సీఎం మేడిగడ్డ బ్యారేజ్కు చేరుకుని అనిల్ జైన్తో కలిసి బ్యారేజ్‌ను పరిశీలించారు. అక్కడే ఇరిగేషన్ అధికారులతో సమీక్ష నిర్వహించి ప్రాజెక్టు పరిస్థితులపై చర్చించారు.

సీఎం వెంట మంత్రులు దుద్దిళ్ల శ్రీధర్‌బాబు, గడ్డం వివేక్ వెంకటస్వామి, అడ్లూరి లక్ష్మణ్ కుమార్, పెద్దపల్లి ఎంపీ గడ్డం వంశీకృష్ణ, ఉత్తమ్ కుమార్ రెడ్డి, పొంగులేటి శ్రీనివాస్ రెడ్డి, పొన్నం ప్రభాకర్ తదితరులు పాల్గొన్నారు.

అనంతరం కాటారం మండలం నస్తూరిపల్లి వద్ద ఏర్పాటు చేసిన బహిరంగ సభలో సీఎం ప్రసంగించనున్నారు.

సీఎం పర్యటనకు ముందస్తు సమీక్ష… భద్రతపై ప్రత్యేక దృష్టి ఎస్పీ సంకీర్త
కాలేశ్వరం/బీబీఎంఏ న్యూస్
ముఖ్యమంత్రి రేవంత్ రెడ్డి పర్యటన నేపథ్యంలో కాలేశ్వరంలో నిర్వహించనున్న సభ ఏర్పాట్లపై ఆదివారం సమగ్ర సమీక్ష నిర్వహించారు. ఈ నెల 20వ తేదీన ముఖ్యమంత్రి భూపాలపల్లి జిల్లాకు రానున్న సందర్భంలో జిల్లా కలెక్టర్ రాహుల్ శర్మ ఐఏఎస్,జిల్లా ఎస్పీ సిరిశెట్టి సంకీర్త్ ఐపీఎస్, ములుగు జిల్లా ఎస్పీ సుధీర్ రామ్నాథ్ కేకన్ ఐపీఎస్ కలిసి ఏర్పాట్లను పరిశీలించారు.
సభ జరుగనున్న ప్రాంగణాన్ని సందర్శించి అక్కడి ఏర్పాట్లను సమీక్షించారు. హెలిప్యాడ్ స్థలం, వాహనాల పార్కింగ్ ప్రాంతాలు, వేదిక నిర్మాణం వంటి అంశాలను వారు ప్రత్యక్షంగా పరిశీలించారు. సభ ప్రాంగణంలో ఏర్పాటు చేస్తున్న బారికేడ్లు, స్టేజ్ సదుపాయాలపై అధికారులను ప్రశ్నించి వివరాలు తెలుసుకున్నారు. అలాగే హెలిప్యాడ్ వద్ద భద్రతా ప్రమాణాలను కూడా పరిశీలించారు.
అదనంగా భద్రతా చర్యలు, ట్రాఫిక్ నియంత్రణ, ప్రజలకు కల్పించాల్సిన సౌకర్యాలపై సంబంధిత అధికారులకు స్పష్టమైన సూచనలు చేశారు. కార్యక్రమం ఎటువంటి అంతరాయం లేకుండా సజావుగా సాగేందుకు అన్ని విభాగాలు సమన్వయంతో పని చేయాలని ఆదేశించారు. ప్రజల రాకపోకలకు ఇబ్బంది కలగకుండా ముందస్తు చర్యలు తీసుకోవాలని కూడా సూచించారు.

గోదావరిఖని: గోదావరిఖని ప్రాంతంలో శనివారం ఉదయం జరిగిన రోడ్డు ప్రమాదంలో శ్రీ చైతన్య స్కూల్ టీచర్ గాజవేని వెన్నెల (26) మృతి చెందింది. ఎన్టీఆర్ నగర్ నుండి లక్ష్మీపురంలోని శ్రీ చైతన్య స్కూలుకు స్కూటీపై వెళ్తున్న సమయంలో గౌతమి నగర్ మూలమలుపు వద్ద వెనుక నుండి వచ్చిన డీసీఎం వ్యాన్ ఢీకొట్టింది. ప్రమాదంలో వెన్నెల తీవ్రంగా గాయపడి అక్కడికక్కడే ప్రాణాలు కోల్పోయింది. సమాచారం అందుకున్న పోలీసులు సంఘటనా స్థలానికి చేరుకుని మృతదేహాన్ని స్థానిక ప్రభుత్వాసుపత్రికి తరలించారు. ఘటనపై కేసు నమోదు చేసి దర్యాప్తు చేపట్టారు.