BBMA POLICE e:NEWS // ఆర్యవైశ్యుల అభివృద్ధికి కృషి – మాజీ మంత్రి టీజీ వెంకటేష్

తిరుపతి, మార్చి 8: రాష్ట్రంలో ఆర్యవైశ్యుల అభివృద్ధి, ఐక్యత, సంఘ సభ్యుల బలోపేతం కోసం నిరంతరం కృషి చేస్తామని మాజీ మంత్రి, మాజీ రాజ్యసభ సభ్యులు టీజీ వెంకటేష్ తెలిపారు. రాష్ట్ర ఆర్యవైశ్య మహాసభ ఆధ్వర్యంలో తిరుపతి జిల్లా ఆర్యవైశ్య మహాసభ నూతన కార్యవర్గ ప్రమాణ స్వీకార మహోత్సవం ఆదివారం ఘనంగా నిర్వహించారు. ఈ కార్యక్రమంలో దిండుకుర్తి నరసింహులు అధ్యక్షులుగా, నూతలపాటి హేమంత్ కుమార్ ప్రధాన కార్యదర్శిగా, పబ్బతి మధుసూధన కోశాధికారిగా ప్రమాణ స్వీకారం చేశారు. వీరితో పాటు ఇతర కార్యవర్గ సభ్యులు కూడా తమ బాధ్యతలను స్వీకరించారు.

ఈ కార్యక్రమానికి ముఖ్య అతిథిగా మాజీ మంత్రి టీజీ వెంకటేష్, స్థానిక ఎమ్మెల్యే శ్రీనివాసులు హాజరయ్యారు. ఈ సందర్భంగా టీజీ వెంకటేష్ మాట్లాడుతూ ఆర్యవైశ్య సమాజానికి ప్రభుత్వం అందించే పథకాలు సక్రమంగా అమలు అయ్యేలా కృషి చేస్తామని తెలిపారు. యువతకు ఉద్యోగ, ఉపాధి అవకాశాలు కల్పించేందుకు ప్రత్యేక ప్రణాళికలు రూపొందించడంతో పాటు వివాహ పరిచయ వేదికలు ఏర్పాటు చేసి సమాజానికి అవసరమైన సహాయ సహకారాలు అందిస్తామని అన్నారు.

నూతనంగా బాధ్యతలు స్వీకరించిన కార్యవర్గ సభ్యులు మాట్లాడుతూ సంఘ పెద్దల సూచనలు, మార్గదర్శకత్వంతో సమాజ అభివృద్ధి కోసం కృషి చేస్తామని తెలిపారు. విద్య, వైద్యం, సేవా కార్యక్రమాలను విస్తృతంగా నిర్వహిస్తూ యువతలో భక్తి భావాలను పెంపొందించే కార్యక్రమాలను చేపడతామని చెప్పారు. రాజకీయంగా కూడా ఆర్యవైశ్యులు ఎదగేందుకు ప్రణాళికాబద్ధంగా చర్యలు తీసుకుంటామని తెలిపారు.

మహాత్మా గాంధీ, అమరజీవి పొట్టి శ్రీరాములు, ఉమ్మడి ఆంధ్రప్రదేశ్ మాజీ ముఖ్యమంత్రి కొణిజేటి రోశయ్య వంటి మహనీయులు ఆర్యవైశ్య వర్గానికి చెందినవారు కావడం గర్వకారణమని పేర్కొన్నారు. వారి త్యాగాలు, సేవలను స్మరించుకుంటూ వారి అడుగుజాడల్లో నడవడం ప్రతి ఒక్కరి బాధ్యత అని అన్నారు. వాసవి పురాణంలో పేర్కొన్న ధర్మాలను భవిష్యత్ తరాలకు అందిస్తూ మన సంస్కృతి సంప్రదాయాలను కాపాడుకోవాలని పిలుపునిచ్చారు.

ఈ ప్రమాణ స్వీకార మహోత్సవానికి ఆర్యవైశ్య సంఘ సభ్యులు, కుటుంబ సభ్యులు, మిత్రులు, అభిమానులు పెద్ద సంఖ్యలో హాజరై కార్యక్రమాన్ని విజయవంతం చేశారు. కార్యక్రమాన్ని విజయవంతం చేసిన ప్రతి ఒక్కరికి సంఘ ప్రతినిధులు కృతజ్ఞతలు తెలిపారు.