ప్రజల గుండెల్లో చిరస్థాయిగా నిలిచిన సేవామూర్తి

రామగుండం, జూన్ 3 (బిబిఎంఏ న్యూస్ ):

రామగుండం ప్రాంత ప్రజల గుండెల్లో చెరగని ముద్ర వేసుకున్న ప్రముఖ వ్యాపారవేత్త, సామాజిక సేవకుడు, రాజకీయ నాయకుడు గోపు అయిలయ్య యాదవ్ అకాల మరణం చెందడం తీవ్ర విషాదాన్ని మిగిల్చింది. కోల్‌కతాలో గుండెపోటుతో ఆయన కన్నుమూసినట్లు సమాచారం అందడంతో రామగుండం, గోదావరిఖని సహా పరిసర ప్రాంతాల్లో విషాద ఛాయలు అలుముకున్నాయి. కుటుంబ సభ్యులు, స్నేహితులు, అభిమానులు, ప్రజాప్రతినిధులు ఆయన మరణవార్తపై దిగ్భ్రాంతి వ్యక్తం చేస్తున్నారు.

గోపు అయిలయ్య యాదవ్ పేరు వినగానే ముందుగా గుర్తుకొచ్చేది ఆయన సేవాభావం, మంచితనం. రాజకీయాలకు అతీతంగా ప్రతి ఒక్కరితో సత్సంబంధాలు కొనసాగిస్తూ ప్రజల కష్టసుఖాల్లో భాగస్వామిగా నిలిచారు. ఆపదలో ఉన్నవారికి ఆర్థిక సాయం చేయడం, పేద విద్యార్థుల విద్యకు అండగా నిలవడం, అనారోగ్యంతో బాధపడుతున్న వారికి సహకారం అందించడం వంటి సేవా కార్యక్రమాలతో ప్రజల మన్ననలు పొందారు.

వ్యాపార రంగంలో విజయవంతమైన వ్యక్తిగా ఎదిగిన ఆయన, సంపాదించిన దాంట్లో కొంత భాగాన్ని సమాజ సేవకు వెచ్చిస్తూ ప్రత్యేక గుర్తింపు పొందారు. తన వద్దకు వచ్చిన ప్రతి ఒక్కరిని ఆప్యాయంగా పలకరిస్తూ, వారి సమస్యలను ఓపికగా విని సాధ్యమైనంత మేర సహాయం చేసేవారు.

స్వర్గీయ నందమూరి తారక రామారావు స్థాపించిన తెలుగుదేశం పార్టీలో మూడు దశాబ్దాల పాటు ప్రజాసేవ చేసిన ఆయన, అనంతరం తెలంగాణ ఉద్యమంలో చురుకైన పాత్ర పోషించి, తెలంగాణ రాష్ట్ర సమితిలో రాష్ట్ర నాయకుడిగా కొనసాగుతూ రామగుండం నియోజకవర్గ ప్రజలకు సేవలందించారు.

ప్రచార ఆర్భాటాలకు దూరంగా నిశ్శబ్దంగా సేవలు అందించిన అయిలయ్య యాదవ్ మరణం రామగుండం ప్రాంతానికి తీరని లోటుగా మారింది. ఒక మంచి మనిషిని, సేవాతత్పరుడిని, ఆపన్నహస్తాన్ని కోల్పోయామని ప్రజలు ఆవేదన వ్యక్తం చేస్తున్నారు.

“పదవులతో కాదు.. మంచితనంతో ప్రజల హృదయాల్లో నిలిచిపోయిన వ్యక్తి గోపు అయిలయ్య యాదవ్” అంటూ పలువురు కన్నీటి నివాళులు అర్పించారు. ఆయన ఆత్మకు శాంతి చేకూరాలని, కుటుంబ సభ్యులకు మనోధైర్యం ప్రసాదించాలని ప్రజలు ప్రార్థిస్తున్నారు.

పెద్దపల్లి, జూన్ 2 (బిబిఎంఏ న్యూస్):

పెద్దపల్లి జిల్లా కలెక్టరేట్‌లో మంగళవారం నిర్వహించిన తెలంగాణ రాష్ట్ర అవతరణ దినోత్సవ వేడుకల్లో రామగుండం ఎమ్మెల్యే ఎం.ఎస్. రాజ్ ఠాకూర్ పాల్గొన్నారు. ఈ సందర్భంగా తెలంగాణ అమరవీరులకు ఘన నివాళులర్పించి రాష్ట్ర ప్రజలకు అవతరణ దినోత్సవ శుభాకాంక్షలు తెలిపారు.

అనంతరం ఎమ్మెల్యే మాట్లాడుతూ, తెలంగాణ రాష్ట్ర సాధన కోసం ప్రాణత్యాగాలు చేసిన అమరవీరుల త్యాగాలు చిరస్మరణీయమని పేర్కొన్నారు. నాలుగు కోట్ల ప్రజల ఆకాంక్షలకు ప్రతిరూపంగా తెలంగాణ రాష్ట్రం అవతరించిందని, ఆరు దశాబ్దాల తెలంగాణ కలను సాకారం చేసిన నాయకత్వానికి కృతజ్ఞతలు తెలిపారు.

స్వపరిపాలనతో తెలంగాణ అన్ని రంగాల్లో అభివృద్ధి సాధిస్తూ దేశానికి ఆదర్శంగా నిలుస్తోందని అన్నారు. వ్యవసాయం, విద్య, పారిశ్రామిక రంగాలు, మౌలిక సదుపాయాల అభివృద్ధిలో రాష్ట్రం ముందంజలో ఉందని పేర్కొన్నారు. తెలంగాణ మరింత అభివృద్ధి చెందేందుకు ప్రజలందరూ భాగస్వాములు కావాలని పిలుపునిచ్చారు.

ఈ కార్యక్రమంలో రాష్ట్ర ప్రభుత్వ విప్, పెద్దపల్లి ఎమ్మెల్యే చింతకుంట విజయరమణరావు, జిల్లా కలెక్టర్, మేయర్, డిప్యూటీ మేయర్, కార్పొరేటర్లు, మున్సిపల్ ప్రజాప్రతినిధులు, నాయకులు, కార్యకర్తలు పాల్గొన్నారు.

రామగుండం, జూన్ 2 ( బిబిఎంఏ న్యూస్):

రామగుండం పోలీస్ కమిషనరేట్‌లో తెలంగాణ రాష్ట్ర ఆవిర్భావ దినోత్సవ వేడుకలను ఘనంగా నిర్వహించారు. ఈ సందర్భంగా పోలీస్ కమిషనర్ అంబర్ కిషోర్ ఝా జాతీయ జెండాను ఆవిష్కరించి పోలీసు అధికారులు, సిబ్బందికి తెలంగాణ ఆవిర్భావ దినోత్సవ శుభాకాంక్షలు తెలిపారు.

ఈ సందర్భంగా సీపీ మాట్లాడుతూ తెలంగాణ రాష్ట్ర ఆవిర్భావం ఎందరో అమరవీరుల త్యాగాలు, పోరాటాల ఫలితమని పేర్కొన్నారు. రాష్ట్ర సాధన కోసం తమ ప్రాణాలను అర్పించిన మహనీయులను స్మరించుకోవడం ప్రతి ఒక్కరి బాధ్యత అని అన్నారు. రాష్ట్ర ఏర్పాటుతో వ్యవసాయం, విద్య, వైద్యం, మౌలిక సదుపాయాలు, పరిశ్రమల రంగాల్లో విశేష అభివృద్ధి జరిగిందని తెలిపారు.

ప్రజలకు మెరుగైన సేవలు అందించడమే పోలీసు శాఖ ప్రధాన లక్ష్యమని, అవినీతి, నిర్లక్ష్యానికి ఎట్టి పరిస్థితుల్లోనూ తావు ఇవ్వబోమని స్పష్టం చేశారు. ప్రజల భద్రత, సంక్షేమం కోసం పోలీసు శాఖ 24 గంటల పాటు అందుబాటులో ఉంటూ సేవలందిస్తుందని చెప్పారు. విధి నిర్వహణలో ప్రతిభ కనబరిచిన పలువురు పోలీసు అధికారులకు రాష్ట్ర ప్రభుత్వం ప్రకటించిన సేవా పతకాలను సీపీ ప్రదానం చేశారు.

కార్యక్రమంలో అడిషనల్ డీసీపీ కె. శ్రీనివాస్, వివిధ విభాగాల ఏసీపీలు, ఇన్‌స్పెక్టర్లు, ఎస్‌ఐలు, పోలీసు సిబ్బంది పాల్గొన్నారు.