ఆర్జీ-1 ఏరియాలోని జీవీటీసీ (జీవీటీసీ ) కేంద్రంలో గత కొన్ని నెలలుగా ఫ్రిడ్జ్ పనిచేయకపోవడంతో కార్మికులు, ట్రైనింగ్‌కు వచ్చే అభ్యర్థులు,ఇతరులు తీవ్ర ఇబ్బందులు ఎదుర్కొంటున్నారు. మండుతున్న ఎండల నేపథ్యంలో చల్లటి తాగునీరు అందుబాటులో లేకపోవడం వల్ల అక్కడికి వచ్చే వారు అలమటిస్తున్నారని తెలిపారు.

ఈ సమస్యపై స్పందించిన సీఐటీయూ యంగ్ వర్కర్స్ కమిటీ నాయకులు, వెంటనే పనిచేయకుండా ఉన్న ఫ్రిడ్జ్‌కు మరమ్మత్తులు చేపట్టి కార్మికులకు తాగునీటి సౌకర్యం కల్పించాలని యాజమాన్యాన్ని డిమాండ్ చేశారు. వేసవి తీవ్రతను దృష్టిలో ఉంచుకుని కార్మికుల ఆరోగ్యాన్ని పరిరక్షించే చర్యలు తీసుకోవాలని కోరారు.

బిబిఎంఏ న్యూస్ / గోదావరిఖని మే 16

పెద్దపల్లి జిల్లాలో కెమిస్ట్ అండ్ డ్రగ్గిస్ట్ అసోసియేషన్ ఆధ్వర్యంలో ఈ నెల 20న నిర్వహించనున్న దేశవ్యాప్త మెడికల్ షాపుల బంద్‌కు మద్దతుగా శనివారం పోస్టర్‌ను విడుదల చేశారు. అఖిల భారత కెమిస్టులు, డ్రగ్గిస్టుల సంఘం (AIOCD) పిలుపు మేరకు దేశవ్యాప్తంగా 12.40 లక్షల మెడికల్ షాపులు, ఫార్మసీలు బంద్‌లో పాల్గొననున్నట్లు నాయకులు తెలిపారు.

ఆన్‌లైన్‌లో నియంత్రణ లేకుండా మందుల విక్రయాలు జరగడం, డాక్టర్ చీటీ లేకుండానే మందులు అందించడం, కార్పొరేట్ కంపెనీలు భారీ డిస్కౌంట్లతో చిన్న వ్యాపారులను నష్టపరచడం, కల్తీ ఔషధాల నియంత్రణలో వైఫల్యం వంటి సమస్యలపై ఈ బంద్ చేపడుతున్నట్లు పేర్కొన్నారు. అలాగే ఆన్‌లైన్ ప్లాట్‌ఫారమ్‌లలో ఒకే డాక్టర్ ప్రిస్క్రిప్షన్‌ను పలుమార్లు వినియోగిస్తున్నారని ఆరోపించారు.

ఈ సందర్భంగా జిల్లా అధ్యక్షుడు ఎం. వినోద్ కుమార్, ప్రధాన కార్యదర్శి కె. రాజేందర్, కోశాధికారి పోలు సతీష్ మాట్లాడుతూ పెద్దపల్లి జిల్లా గోదావరిఖని, రామగుండం పారిశ్రామిక ప్రాంతాల్లోని సుమారు 650 మెడికల్ షాపులు బంద్‌లో పాల్గొని నిరసన తెలపాలని పిలుపునిచ్చారు. కార్యక్రమంలో పిట్టల శ్రీనివాస్, ఎన్. కరుణాకర్ రెడ్డి, విష్ణుమూర్తి, కోటగిరి వాసు, సంతోష్, అశోక్, మార్గాచారి, రాజేందర్, సత్యనారాయణ, శ్రీధర్ తదితరులు పాల్గొన్నారు.

బెల్లంపల్లి 1 టౌన్ పోలీసుల కమ్యూనిటీ కాంటాక్ట్ ప్రోగ్రాం

మంచిర్యాల జిల్లా బెల్లంపల్లిలో ప్రజల భద్రత, శాంతిభద్రతల పరిరక్షణ లక్ష్యంగా బెల్లంపల్లి 1 టౌన్ పోలీసులు కమ్యూనిటీ కాంటాక్ట్ ప్రోగ్రామ్ నిర్వహించారు. రామగుండం పోలీస్ కమిషనర్ అంబర్ కిషోర్ ఝా, మంచిర్యాల డీసీపీ ఏ. భాస్కర్ ఆదేశాల మేరకు, ఏసీపీ కిరణ్ కుమార్ పర్యవేక్షణలో ఇన్‌స్పెక్టర్ కె. శ్రీనివాస్‌రావు ఆధ్వర్యంలో శుక్రవారం తెల్లవారుజామున బస్తీ ప్రాంతాల్లో విస్తృత తనిఖీలు చేపట్టారు.

ఈ సందర్భంగా అనుమానాస్పద ప్రాంతాలను పరిశీలించి, కొత్తగా వచ్చిన వ్యక్తుల వివరాలు సేకరించారు. సరైన పత్రాలు లేని 50 ద్విచక్ర వాహనాలు, 6 ఆటోలను పోలీసులు సీజ్ చేశారు. ప్రజల సహకారంతోనే నేరాల నిర్మూలన సాధ్యమని ఇన్‌స్పెక్టర్ శ్రీనివాస్‌రావు తెలిపారు.

అపరిచితులు, నేర చరిత్ర కలిగిన వ్యక్తులపై సమాచారం ఉంటే వెంటనే పోలీసులకు తెలియజేయాలని కోరారు. యువత గంజాయి, డ్రగ్స్ వంటి మత్తు పదార్థాలకు దూరంగా ఉండాలని సూచించారు. కాలనీల భద్రత కోసం సీసీ కెమెరాలు ఏర్పాటు చేసుకోవాలని, వాహనదారులు తప్పనిసరిగా హెల్మెట్ ధరించి డ్రైవింగ్ లైసెన్స్ కలిగి ఉండాలని సూచించారు. కార్యక్రమంలో 20 మంది పోలీసు సిబ్బంది, స్థానిక ప్రజలు పాల్గొన్నారు.