•గత పాలకుడి నిర్లక్ష్యంతో అభివృద్ధి శూన్యం – ఒక్క అవకాశం ఇస్తే డివిజన్ రూపురేఖలు మారుస్తా : కర్క పద్మజ (సుజాత) శ్రీనివాస్

బిబిఎంఏ న్యూస్

గోదావరిఖని / ఫిబ్రవరి 09 :

రామగుండం మున్సిపల్ కార్పొరేషన్ పరిధిలోని 55వ డివిజన్‌లో గత పాలకుల నిర్లక్ష్యంతో అభివృద్ధి పూర్తిగా కుంటుపడిందని, ప్రజల సమస్యలను పట్టించుకునే నాయకత్వం లేక డివిజన్ వెనుకబడిపోయిందని 55వ డివిజన్ బీఆర్ఎస్ పార్టీ అభ్యర్థి కర్కపద్మజ (సుజాత) శ్రీనివాస్ తీవ్ర విమర్శలు చేశారు.

మున్సిపల్ ఎన్నికల ప్రచారంలో భాగంగా డివిజన్ పరిధిలో ఇంటింటి ప్రచారం నిర్వహించిన ఆమె, స్థానికులతో నేరుగా మాట్లాడి సమస్యలను తెలుసుకున్నారు. ఈ సందర్భంగా ఆమె మాట్లాడుతూ, గతంలో గెలిచిన నాయకుడు ఎన్నికల సమయంలో ప్రజలకు ఇచ్చిన హామీలను పూర్తిగా విస్మరించారని, ఐదేళ్ల పాలనలో ఒక్క అభివృద్ధి పనిని కూడా సక్రమంగా పూర్తి చేయలేదని ఆరోపించారు. ప్రజల నమ్మకాన్ని ద్రోహం చేస్తూ అభివృద్ధి పేరుతో మోసం చేశారని విమర్శించారు.

డివిజన్‌లో రోడ్లు దారుణ స్థితిలో ఉన్నాయని, డ్రైనేజీ వ్యవస్థ పూర్తిగా అస్తవ్యస్తంగా మారిందని తెలిపారు. తాగునీటి సరఫరాలో తీవ్ర ఇబ్బందులు ఎదురవుతున్నాయని, పారిశుధ్య నిర్వహణ లోపాల వల్ల ప్రజలు అనేక సమస్యలు ఎదుర్కొంటున్నారని పేర్కొన్నారు. వీధిదీపాలు సక్రమంగా పనిచేయక భద్రతా సమస్యలు తలెత్తుతున్నాయని, కాలనీల్లో కనీస మౌలిక వసతులకే ప్రజలు పోరాడాల్సిన పరిస్థితి ఏర్పడిందని ఆవేదన వ్యక్తం చేశారు.

కాంగ్రెస్ ప్రభుత్వం అధికారంలోకి వచ్చిన తరువాత ప్రజలకు ఇచ్చిన హామీలను విస్మరించిందని, ముఖ్యంగా సింగరేణి కార్మికులకు అన్యాయం జరుగుతోందని పద్మజ అన్నారు. కార్మికుల సంక్షేమం పేరుతో మాటలకే పరిమితమై, ఆచరణలో ప్రభుత్వం పూర్తిగా విఫలమైందని విమర్శించారు. కార్మిక కుటుంబాలు ఎదుర్కొంటున్న సమస్యలను పట్టించుకునే పరిస్థితి ప్రభుత్వానికి లేదని ఆరోపించారు.

ఎన్నికల సమయంలో మాత్రమే ప్రజల వద్దకు వచ్చే నాయకులను ఈసారి ప్రజలే నిలదీయాలని ఆమె పిలుపునిచ్చారు. గత ఎన్నికల్లో ఇచ్చిన హామీలు ఎందుకు అమలుకాలేదో ప్రశ్నించాలని, అభివృద్ధి పనులకు ఎందుకు ప్రాధాన్యం ఇవ్వలేకపోయారో అడగాలని ప్రజలకు సూచించారు. పెత్తందారి రాజకీయాలకు ముగింపు పలికి, నిజంగా ప్రజల కోసం పని చేసే నాయకత్వాన్ని ఎన్నుకునే సమయం వచ్చిందని ఆమె స్పష్టం చేశారు.

తాను అధికార రాజకీయాలకు దూరంగా, ప్రజల మధ్య ఉండే వ్యక్తిగా, కుటుంబ సభ్యురాలిలా డివిజన్ అభివృద్ధి కోసం పని చేస్తానని కర్క పద్మజ (సుజాత) శ్రీనివాస్ హామీ ఇచ్చారు. ప్రజల సమస్యలను నేరుగా తెలుసుకుని, వాటి పరిష్కారానికి నిరంతరం అందుబాటులో ఉంటానని తెలిపారు. డివిజన్ అభివృద్ధే లక్ష్యంగా ప్రణాళికాబద్ధంగా ముందుకు సాగుతానని, అవసరమైన నిధులు, పనుల మంజూరుకు సంబంధిత అధికారులతో సమన్వయం చేసుకుంటూ ప్రతి సమస్యపై దృష్టి పెట్టుతానని చెప్పారు.

బీఆర్ఎస్ పార్టీకి ఒక్క అవకాశం ఇస్తే 55వ డివిజన్ రూపురేఖలు మార్చి చూపిస్తానని ధీమా వ్యక్తం చేసిన పద్మజ, అభివృద్ధి అంటే ఏమిటో చేతల్లో చేసి చూపిస్తానని అన్నారు. ఈ ఎన్నికల్లో డివిజన్ ప్రజలు మార్పు కోరుకుంటున్నారని, అభివృద్ధి పథంలో ముందుకు నడిపేందుకు బీఆర్ఎస్ పార్టీకి మద్దతు ఇవ్వాలని విజ్ఞప్తి చేశారు. ప్రజల ఆశీర్వాదంతో గెలుపొందితే ప్రజాసేవకురాలిగా పని చేస్తానని మరోసారి హామీ ఇస్తూ ఆమె తన ప్రసంగాన్ని ముగించారు.