రామగుండం | జూలై 11, 2026 తెలంగాణ రాష్ట్ర వెనుకబడిన తరగతుల సంక్షేమ బీసీ కమిషన్ చైర్మన్‌గా నియమితులైన సందర్భంగా, అలాగే లక్ష్మీపురం గేట్ మహాత్మా గాంధీ విగ్రహం నుంచి పోతన కాలనీ సింగరేణి కారిడార్ రోడ్డు వరకు నూతన రోడ్డు నిర్మాణ పనులు చేపట్టిన సందర్భంగా రామగుండం ఎమ్మెల్యే రాజ్ ఠాగూర్ మక్కన్ సింగ్‌ను స్థానిక ప్రజాప్రతినిధులు మర్యాదపూర్వకంగా కలిసి అభినందించారు.

21వ డివిజన్ కార్పొరేటర్ కందుల స్వరూప సతీష్, కొక్కిరాల శ్రీనివాసరావు ఆధ్వర్యంలో ఎమ్మెల్యేను కలిసి సాలువాతో ఘనంగా సత్కరించి, ప్రాంత అభివృద్ధికి చేస్తున్న కృషికి ప్రత్యేక కృతజ్ఞతలు తెలిపారు. లక్ష్మీపురం ప్రాంత ప్రజలకు మెరుగైన రహదారి సౌకర్యం కల్పించేందుకు రోడ్డు నిర్మాణ పనులు ప్రారంభించడం పట్ల హర్షం వ్యక్తం చేశారు.

ఈ కార్యక్రమంలో నగర మేయర్ మహంకాళి స్వామి, కందుల సతీష్, వేణుగోపాలరావు, మహమ్మద్ గౌస్, ఇరుకుల సంతోష్, కె. అశోక్, రఘు తదితరులు పాల్గొన్నారు.

జగిత్యాల,జూలై 11: వెల్గటూర్ పోలీస్ స్టేషన్ పరిధిలో మహిళపై అత్యాచారానికి పాల్పడిన గంగుల సనత్ కుమార్ (38)కు జగిత్యాల 1వ అదనపు జిల్లా & సెషన్స్ కోర్టు 10 సంవత్సరాల కఠిన కారాగార శిక్షతో పాటు రూ.6,000 జరిమానా విధించింది. 2024 ఆగస్టులో జరిగిన ఈ ఘటనపై అప్పటి ఎస్‌ఐ ఉమాసాగర్ కేసు నమోదు చేయగా, సర్కిల్ ఇన్‌స్పెక్టర్ రామ్ నరసింహారెడ్డి సమగ్ర దర్యాప్తు చేసి పటిష్టమైన ఆధారాలతో ఛార్జిషీట్ దాఖలు చేశారు.

విచారణ సందర్భంగా ప్రభుత్వ న్యాయవాది బిట్ల నర్సయ్య సమర్థవంతంగా వాదనలు వినిపించగా, సాక్ష్యాధారాలను పరిశీలించిన న్యాయమూర్తి శ్రీమతి జి. సునీత రవీంద్ర రెడ్డి నిందితుడిని దోషిగా తేల్చి శిక్ష విధించారు.

ఈ సందర్భంగా జిల్లా ఎస్పీ అశోక్ కుమార్, ఐపీఎస్ మాట్లాడుతూ మహిళలు, యువతులు తమపై జరిగే వేధింపులు, లైంగిక దాడులు లేదా ఇతర అన్యాయాల విషయంలో భయపడకుండా వెంటనే పోలీసులను ఆశ్రయించాలని సూచించారు. బాధితులకు న్యాయం జరిగేలా, నిందితులకు చట్టప్రకారం కఠిన శిక్షలు పడేలా పోలీసు శాఖ కట్టుబడి పనిచేస్తోందని తెలిపారు. ఈ కేసులో సమర్థంగా పనిచేసిన పీపీ బిట్ల నర్సయ్య, దర్యాప్తు అధికారి రామ్ నరసింహారెడ్డి, అప్పటి ఎస్‌ఐ ఉమాసాగర్, కోర్టు సిబ్బంది తదితరులను ఎస్పీ అభినందించారు.

గోదావరిఖని, జూలై 11: రోడ్డు ప్రమాదాల్లో గాయపడిన బాధితులను ప్రమాదం జరిగిన తొలి గంట (గోల్డెన్ అవర్)లోపు ఆసుపత్రికి తరలిస్తే ప్రాణాలు కాపాడే అవకాశాలు గణనీయంగా పెరుగుతాయని కరీంనగర్ మెడికవర్ ఆసుపత్రి వైద్య నిపుణులు తెలిపారు. శనివారం గోదావరిఖని ప్రెస్ క్లబ్‌లో ట్రామా కేర్‌పై నిర్వహించిన అవగాహన సదస్సులో వారు మాట్లాడారు.

న్యూరో సర్జన్ డాక్టర్ రాజీవ్ రెడ్డి, సర్జికల్ గ్యాస్ట్రోఎంటరాలజిస్ట్ డాక్టర్ దిలీప్ రెడ్డి, కార్డియోథొరాసిక్ సర్జన్ డాక్టర్ రవికుమార్ మాట్లాడుతూ రోడ్డు ప్రమాదాల సమయంలో బాధితులకు ప్రాథమిక చికిత్స అందించడంలో తీసుకోవాల్సిన జాగ్రత్తలను వివరించారు. అన్ని వైద్య విభాగాలు అందుబాటులో ఉన్న మల్టీ స్పెషాలిటీ ఆసుపత్రికి వెంటనే తరలిస్తే అత్యవసర చికిత్స అందించి ప్రాణాలు కాపాడడం సులభమవుతుందని తెలిపారు.

ఈ కార్యక్రమంలో క్రిటికల్ కేర్ నిపుణులు డాక్టర్ ఉపేందర్ రెడ్డి, ఎమర్జెన్సీ మెడిసిన్ నిపుణులు డాక్టర్ సత్యనారాయణ, అనస్థీషియా నిపుణులు డాక్టర్ విష్ణువర్ధన్ రెడ్డి తదితరులు పాల్గొని ట్రామా కేర్ ప్రాధాన్యతపై అవగాహన కల్పించారు.