* రూ.1.94 కోట్లకు పైగా ఆస్తులు గుర్తింపు

బిబిఎంఏ న్యూస్ / హనుమకొండ : మే 20 వరంగల్ సబ్‌రిజిస్ట్రార్ కార్యాలయం సబ్‌రిజిస్ట్రార్-2గా పనిచేసిన దావులూరి ఆనంద్‌పై అక్రమాస్తుల కేసు నమోదు చేసినట్లు తెలంగాణ ఏసీబీ వెల్లడించింది. ప్రస్తుతం ఆయన సస్పెన్షన్‌లో ఉన్నారు.

అధికారిక ఆదాయానికి మించి అవినీతి మార్గాల్లో ఆస్తులు కూడబెట్టినట్లు ఆరోపణలు రావడంతో అవినీతి నిరోధక చట్టం కింద కేసు నమోదు చేసి బుధవారం ఆయన నివాసంతో పాటు బంధువుల ఇళ్లలో ఏసీబీ అధికారులు సోదాలు నిర్వహించారు.

సోదాల్లో రెండు ఇండ్లు, ఆరు ప్లాట్లు, రూ.24.50 లక్షల నగదు, బ్యాంక్ నిల్వలు, బంగారం, వెండి ఆభరణాలు, వాహనాలు, గృహోపకరణాలు గుర్తించినట్లు అధికారులు తెలిపారు. ఇప్పటివరకు గుర్తించిన ఆస్తుల విలువ సుమారు రూ.1.94 కోట్లుగా అంచనా వేస్తుండగా, మార్కెట్ విలువ మరింత ఎక్కువగా ఉండే అవకాశముందని పేర్కొన్నారు.

అక్రమాస్తులపై మరింత లోతైన విచారణ కొనసాగుతోందని ఏసీబీ వెల్లడించింది. ప్రజాప్రతినిధులు లేదా ప్రభుత్వ ఉద్యోగులు లంచం అడిగితే టోల్ ఫ్రీ నంబర్ 1064కు సమాచారం ఇవ్వాలని ఏసీబీ ప్రజలకు సూచించింది.

భారత్–ఇటలీ వ్యూహాత్మక భాగస్వామ్యానికి కొత్త దిశ

బిబిఎంఏ న్యూస్ / రోమ్ :

భారత ప్రధాని నరేంద్ర మోదీ ఇటలీ అధ్యక్షుడు సెర్జియో మట్టారెల్లాతో రోమ్‌లో నిర్వహించిన భేటీ భారత్–ఇటలీ ద్వైపాక్షిక సంబంధాలకు కొత్త ఊపునిచ్చింది. వాణిజ్యం, పెట్టుబడులు, సాంస్కృతిక అనుబంధాలు మాత్రమే కాకుండా భవిష్యత్ సాంకేతిక రంగాల్లో భాగస్వామ్యాన్ని మరింత విస్తరించేందుకు ఈ సమావేశం కీలక వేదికగా నిలిచింది.

ఈ సందర్భంగా ఇరు దేశాల నాయకులు కృత్రిమ మేధస్సు (AI), కీలక ఖనిజాలు, అంతరిక్ష పరిశోధనలు, అణు శక్తి వంటి వ్యూహాత్మక రంగాల్లో పరస్పర సహకారంపై విస్తృతంగా చర్చించారు. ప్రపంచవ్యాప్తంగా సాంకేతిక, ఆర్థిక, భౌగోళిక మార్పులు వేగంగా జరుగుతున్న నేపథ్యంలో భారత్–ఇటలీ కలిసి పనిచేయడం ద్వారా కొత్త అవకాశాలు సృష్టించవచ్చని అభిప్రాయపడ్డారు.

ఇటలీ యూరప్‌లో ప్రముఖ పారిశ్రామిక దేశంగా ఉండగా, భారత్ ప్రపంచంలో వేగంగా అభివృద్ధి చెందుతున్న ఆర్థిక శక్తిగా ఎదుగుతోంది. ఈ నేపథ్యంలో ఇరు దేశాల మధ్య పెట్టుబడులు, తయారీ రంగం, గ్రీన్ ఎనర్జీ, డిజిటల్ టెక్నాలజీ రంగాల్లో భాగస్వామ్యం మరింత బలోపేతం అయ్యే అవకాశాలు కనిపిస్తున్నాయి.

ప్రత్యేకంగా AI రంగంలో భారత్‌కు ఉన్న ఐటీ నైపుణ్యం, ఇటలీకి ఉన్న పారిశ్రామిక సాంకేతికత కలిస్తే ప్రపంచ మార్కెట్‌లో పోటీ సామర్థ్యం పెరుగుతుందని నిపుణులు భావిస్తున్నారు. కీలక ఖనిజాల విషయంలో ప్రపంచ దేశాలు ప్రత్యామ్నాయ సరఫరా మార్గాల కోసం చూస్తున్న వేళ భారత్–ఇటలీ సహకారం వ్యూహాత్మకంగా ప్రాధాన్యం సంతరించుకుంది.

అంతరిక్ష రంగంలో కూడా ఇరు దేశాల మధ్య సహకారం పెరిగే అవకాశాలు ఉన్నాయి. ఇప్పటికే భారత అంతరిక్ష పరిశోధనా సంస్థ ఇస్రో ప్రపంచవ్యాప్తంగా విశ్వసనీయ సంస్థగా గుర్తింపు పొందగా, యూరోపియన్ దేశాలతో కలిసి పనిచేసే అవకాశాలు మరింత విస్తరించనున్నాయి. అణుశక్తి రంగంలో శుభ్రమైన ఇంధన వనరుల అభివృద్ధి, సాంకేతిక పరిజ్ఞానం మార్పిడి అంశాలు కూడా చర్చకు వచ్చినట్లు సమాచారం.

భారత్–ఇటలీ మధ్య సాంస్కృతిక సంబంధాలు కూడా చారిత్రాత్మకంగా కొనసాగుతున్నాయి. పర్యాటకం, విద్య, కళలు, వారసత్వ పరిరక్షణ రంగాల్లో పరస్పర సహకారం పెంపొందించేందుకు ఇరు దేశాలు ఆసక్తి చూపుతున్నాయి.

ప్రపంచ రాజకీయాల్లో భారత్‌కు పెరుగుతున్న ప్రాధాన్యత నేపథ్యంలో ప్రధాని మోదీ విదేశీ పర్యటనలు, ప్రపంచ నేతలతో సమావేశాలు అంతర్జాతీయ వేదికపై భారత ప్రభావాన్ని మరింత బలోపేతం చేస్తున్నాయని విశ్లేషకులు అభిప్రాయపడుతున్నారు.

ధర్మపురి, (బిబిఎంఎ న్యూస్) – మే 19

జిల్లాలో వరి ధాన్యం కొనుగోలు ప్రక్రియను వేగవంతంగా పూర్తి చేయాలని జిల్లా కలెక్టర్ బి. సత్యప్రసాద్ అధికారులను ఆదేశించారు. మంగళవారం ఆయన పెగడపల్లి మండలం నంచర్ల, దేవికొండ, రామ్‌నగర్ గ్రామాల్లోని కొనుగోలు కేంద్రాలను ఆకస్మికంగా పరిశీలించారు. అనంతరం ఎండపల్లి మండల కేంద్రంలోని వాయుపుత్ర రైస్ మిల్‌తో పాటు గుల్లకోట గ్రామంలోని కొనుగోలు కేంద్రాన్ని సందర్శించారు.

ఈ సందర్భంగా కలెక్టర్ మాట్లాడుతూ కొనుగోలు కేంద్రాలకు వచ్చిన వరి ధాన్యాన్ని మ్యాచర్ వచ్చిన వెంటనే తూకం వేసి ఆలస్యం లేకుండా మిల్లులకు తరలించాలని సూచించారు. రైతులకు ఎలాంటి ఇబ్బందులు కలగకుండా కొనుగోలు ప్రక్రియను పారదర్శకంగా నిర్వహించాలని తెలిపారు.

ధాన్యం తూకం, నిల్వ, రవాణా ప్రక్రియల్లో నిర్లక్ష్యం చోటుచేసుకోకుండా అధికారులు కట్టుదిట్టంగా పర్యవేక్షించాలని ఆయన అన్నారు. కొనుగోలు చేసిన వెంటనే డేటా ఎంట్రీ ఆన్లైన్‌లో నమోదు చేసి రైతుల ఖాతాల్లో సకాలంలో చెల్లింపులు జమ అయ్యేలా చూడాలని ఆదేశించారు.

మిల్లులకు ధాన్యంతో చేరిన లారీలను ఆలస్యం చేయకుండా త్వరగా అన్‌లోడ్ చేసి తిరిగి పంపించాలని మిల్లర్లకు సూచించారు. కొనుగోలు కేంద్రాల వద్ద టార్పాలిన్ కవర్లు అందుబాటులో ఉంచి వరిని వర్షం, తేమ నుంచి రక్షించేలా చర్యలు తీసుకోవాలని తెలిపారు.

జిల్లాలో వరి ధాన్యం కొనుగోలు, నిల్వలు, మిల్లింగ్ ప్రక్రియను సమన్వయంతో వేగవంతం చేయడంతో పాటు రైతులకు ఎలాంటి ఇబ్బందులు తలెత్తకుండా చర్యలు తీసుకోవాలని కలెక్టర్ స్పష్టం చేశారు. రైస్ మిల్లులలో నిల్వలు, మిల్లింగ్, లోడింగ్–అన్‌లోడింగ్ పనుల పురోగతిని పరిశీలించి సంబంధిత అధికారులను వివరాలు అడిగి తెలుసుకున్నారు.

ఈ కార్యక్రమంలో జగిత్యాల ఆర్డీవో మధుసూదన్, డీసీఎస్ఓ జితేందర్ రెడ్డి, డీఎస్ఓ మనోజ్, తహసీల్దార్ అనిల్ మరియు ఇతర అధికారులు పాల్గొన్నారు.