బిబిఎంఏ న్యూస్/రామగుండం, జనవరి 23 :

రామగుండం మున్సిపల్ కార్పొరేషన్ పరిధిలోని 28వ డివిజన్ రాజకీయ సమీకరణలు వేగంగా మారుతున్నాయి. ఈ డివిజన్ జనరల్ రిజర్వేషన్‌గా ఖరారుకావడంతో పలువురు ఆశావహులు బరిలోకి దిగుతున్నారు. ఈ క్రమంలోనే జర్నలిస్ట్, తెలంగాణ ఉద్యమకారుడు గూడూరు లవన్ కుమార్ కార్పొరేటర్ అభ్యర్థిగా పోటీకి దిగడం చర్చనీయాంశంగా మారింది. సాధారణ మధ్యతరగతి నేపథ్యం నుంచి వచ్చిన ఆయన, ప్రజా సమస్యలపై కలం పట్టిన జర్నలిస్టుగా గుర్తింపు పొందారు. డ్రైనేజీ, తాగునీటి కొరత, అంతర్గత రహదారుల దుస్థితి వంటి సమస్యలను ప్రధాన అజెండాగా ప్రజల ముందుకు వెళ్తున్నారు. “మన సమస్యలు తెలిసిన వాడు.. మన మధ్యే ఉండే నాయకుడు” అన్న నినాదంతో ప్రచారం సాగిస్తున్నారు. ప్రధాన పార్టీలు ఇంకా అభ్యర్థులను ఖరారు చేయకముందే ఆయన ముందస్తుగా ప్రచారంలో దూసుకుపోతున్నారు. మార్పు కోరుకునే ఓటర్లు తన వైపు నిలుస్తారని ఆయన ధీమా వ్యక్తం చేస్తున్నారు.

జర్నలిస్ట్ గా పేరు… కార్పొరేటర్‌గా ఆశయం: రాం అశోక్

బిబిఎంఏ న్యూస్/గోదావరిఖని

రామగుండం మున్సిపల్ కార్పొరేషన్ పరిధిలో ప్రజా సమస్యలను నిర్భయంగా వెలుగులోకి తీసుకువచ్చి, అధికారుల దృష్టికి చేర్చి పరిష్కార దిశగా అడుగులు వేయించడంలో ‘నిరుద్యోగి న్యూస్ ఛానల్’ విశేష పాత్ర పోషించింది. ఆ ఛానల్ ద్వారా ప్రజల హృదయాల్లో చెరగని ముద్ర వేసిన విద్యావంతుడు జర్నలిస్ట్ రాం అశోక్ ఇప్పుడు ప్రజాసేవ లక్ష్యంగా రాజకీయ రంగ ప్రవేశం చేశారు.

రామగుండం మున్సిపల్ కార్పొరేషన్ 43వ డివిజన్ అభివృద్ధినే ప్రధాన లక్ష్యంగా తీసుకుని కార్పొరేటర్ అభ్యర్థిగా ప్రజల ముందుకు వస్తున్నట్లు ఆయన ప్రకటించారు. ఈ సందర్భంగా రాం అశోక్ మాట్లాడుతూ, జర్నలిస్టుగా ప్రజా సమస్యలను చూపించడం వరకే పరిమితమయ్యానని, ఇకపై ప్రజాప్రతినిధిగా మారి వాటికి శాశ్వత పరిష్కారాలు చూపించాలన్న సంకల్పంతో ముందుకు వస్తున్నానని తెలిపారు.

తాగునీరు, రోడ్లు, డ్రైనేజీ, పారిశుధ్యం, యువతకు ఉపాధి అవకాశాలు, మహిళల భద్రత వంటి అంశాలపై ప్రత్యేక దృష్టి సారిస్తానని చెప్పారు. “ఒక్క అవకాశం ఇవ్వండి… కార్పొరేటర్‌గా గెలిపించండి” అంటూ ప్రజలను కోరారు. స్థానికంగా ఆయనకు మద్దతు పెరుగుతున్నట్లు సమాచారం.

మంథనిలో పాల ఉత్పత్తులపై అవగాహన సదస్సులో పాల్గొన్న డైరీ సిబ్బంది

బిబిఎంఏ న్యూస్/మంథని

పెద్దపల్లి జిల్లా మంథనిలో ప్రజలలో పాల ఉత్పత్తులపై అవగాహన పెంపొందించేందుకు బీబీఎంఏ ఆధ్వర్యంలో అవగాహన సదస్సు నిర్వహించారు. కరీంనగర్ డైరీ చైర్మన్ చల్మెడ రాజేశ్వరరావు ఆదేశాల మేరకు ఈ కార్యక్రమాన్ని ఏర్పాటు చేశారు. సుమారు 1200 గ్రామాల పాడి రైతుల నుంచి పాలను స్వీకరించి, స్వచ్ఛమైన పాలు వినియోగదారులకు అందించడమే తమ ప్రధాన లక్ష్యమని చైర్మన్ రాజేశ్వరరావు తెలిపారు. ఈ కార్యక్రమంలో డైరీ సిబ్బంది కరుణాకర్, విష్ణు, రాజు, కుమార్, సుధాకర్ తదితరులు పాల్గొని రైతులకు,వినియోగదారులకు మార్గదర్శనం చేశారు.